Investimi në minierat e Kosovës, biznes i shekullit për kroatët
Korporata kroate “Iming” pret të përfitojë miliarda euro nga ajo që e quan “biznes i shekullit” e që lidhet me blerjen e dy minierave në Kosovë. Kjo korporatë në vitin 2007 kishte blerë nëpërmjet privatizimit të udhëhequr nga ish-Agjencia Kosovare e Mirëbesimit (AKM), Minierën e Goleshit për një shumë prej 810 mijë eurosh, ndërsa për Minierën e Strezovcit e kishte paguar 730 mijë euro.
Mediat kroate kanë raportuar se “Goleshi” e “Strezovci” përbëjnë njërën prej sipërfaqeve më të mëdha të magnezitit në Evropë. Sipas sajtit “Croatia Times”, e cila e citon të përditshmen “Veçernji list”, kompania mund të fitojë 60 milionë euro në vit nga biznesi i minierave në Kosovë. “Për 112 milionë euro u vendos të premten se do të investohen në Golesh një vend në rajonin e Prishtinës”, thekson ky medium. Sipas “Croatia Times”, nga ekspertë të ekonomisë në Kroaci është vlerësuar si biznes i shekullit projekti i investimit në minierat e Kosovës.
“Kompania kroate kishte vendosur të investonte para tre vjetësh, por recesioni kishte bërë që projekti të bllokohej deri tash”, thekson ky medium. Gazeta e përditshme “Vecernji list”, sipas këtij sajti kishte raportuar se pronar i kompanisë “Iming”, është kosovari Rrustem Zogaj, i cili e ka edhe shtetësinë e Kroacisë. Sipas projektit të kësaj kompanie prodhimi pritet të fillojë në maj të vitit 2011 dhe kompania planifikon të ketë 600 punëtorë në këto miniera të cilat posedojnë rreth 20 milionë tonë magnezit. Këto dy ish-ndërmarrje shoqërore u patën privatizuar në vitin 2007 nga AKM-ja përmes spin-off-it special. Pasardhësja e saj, Agjencia Kosovare e Privatizimit ka nisur të aplikojë ndëshkime për blerësit e këtyre ndërmarrjeve që futen në katërshen e ish-ndërmarrjeve shoqërore së bashku me Hotel Grandin dhe Industrinë e Duhanit në Gjilan për të cilat blerësit nuk i kanë plotësuar kushtet e kontratës së para tre vjetësh.
Për minierën e Strezovcit që gjendet në Kamenicë dhe që është shitur për 730 mijë euro, blerësi është zotuar të investojë 14 milionë e 200 mijë euro. Data e fillimit të kontratës ka qenë 13 dhjetori i vitit 2007, ndërsa është obliguar që të mbajë 238 punëtorë gjatë dy viteve të punës. Ndërkaq Miniera e Goleshit që gjendet në Lipjan është shitur për 810 mijë euro. Blerësi është zotuar se do të investojë 16 milionë e 200 mijë euro dhe se do të për dy vite pune 355 punëtorë.
Referenca
redakto- Koha.net (16.11.2010)